【本報綜合報道】4年前納比帶領意大利奪取世界盃，受萬民擁戴，但今屆分組賽出局，納比頓成意國人民公敵，日前在意大利小島艾爾巴島現身，仍遭遊客破口大罵，其遭遇竟如時光倒流200年，與剛戰敗嘅拿破崙同樣失意。
意大利帥印已交由柏蘭迪利接掌，「無官一身輕」嘅白頭名帥納比，本想度假避靜，避開西西里島及撒丁島等人流密集度假區，改往較為僻靜嘅艾爾巴島，但仍被球迷認出，捱罵受辱。
日前納比駕駛豪華遊艇到艾爾巴島，準備步入一間餐廳，還未坐下已被食客認出，餐廳內罵聲四起，納比眼見場面失控，無奈起身離去，連食餐飯都冇着落！
其實納比真係好揀唔揀，去咗艾爾巴島，因為呢個小島係大約200年前法國拿破崙經歷「萊比錫戰役」落敗，被流放所在。當年拿破崙稱霸歐洲，比4年前納比高舉世界盃更風光，後來拿破崙兵敗被俘，囚禁於艾爾巴島，如今納比竟踏着前人軌迹，在小島受辱。
拿破崙逃離艾爾巴島之後，再遇「滑鐵盧戰役」而無法翻身，納比往後日子，又會有何遭遇？