烏拉圭墨西哥闖16強
法國衰到貼地，昨晚A組最後一仗1比2不敵南非，3戰1和2負得1分，繼上屆歐國盃小組包艇後，再一次於大賽包尾出局，可謂史上最曳「法蘭西兵團」！同一時間烏拉圭1比0小勝墨西哥，但墨國仍以較佳得失球力壓南非，與烏拉圭晉級16強。南非雖飲恨被擯，但擊敗法國已有所交代，國民都應該收貨！
法國今戰非勝不可，但賽前因爆發內訌，多名主力都跟領隊杜明歷反面，今仗亨利、馬隆達、艾拉、艾比度都坐於後備席，簡直讓足車馬炮。南非雖然實力較弱，但主場出擊戰意遠勝對手，廿分鐘南非右路開出角球，法國門將洛里斯出迎打空，古馬奴頂入空門，為主隊打開紀錄。25分鐘法國雪上加霜，中場指揮官哥古夫因「批㬹」打人領紅被逐，法國少打一人。
主辦國開齋球迷瘋狂
南非人多蝦人少氣勢如虹，37分鐘戴亞比犯錯助攻對手，麥菲拿門前成功執雞射成2比0。1分鐘後主隊班納柏加曾將皮球送入網窩，但卻因越位在先而慘食詐胡，不過全場球迷已陷入瘋狂狀態！
下半場南非繼續搶攻，其中麥菲拿演出極為搶鏡，50分鐘先接應舒巴拉拿妙傳勁射中楣，7分鐘後再次起腳，又被洛里斯救出。法國大難不死，70分鐘列貝利送出地波，後備馬隆達門前追成較接近紀錄。雖然破蛋成功，但法國好似已完成任務，之後放慢腳步「懶懶閒」，最後輸1比2毫無羞恥感。
烏軍挫墨國 唔係默契波
同時間另一場賽事，烏拉圭憑前鋒蘇亞雷斯於上半場頭槌建功，以1比0小勝墨西哥，3戰2勝1和得7分於A組取得首名出線權；而墨西哥雖然輸波，和南非同得4分，但因為得失球較佳，得以次名晉級。主辦國南非雖然未能出線，但3仗演出不俗，打和墨西哥、擊敗法國，光榮出局令國民好滿意；相反法國3仗僅得1分，球隊演出不知所謂，元氣大傷下未來仍有排執！
■本報綜合報道