【本報綜合報道】英格蘭對斯洛文尼亞賽前有吉兆，其一係BBC直播今場生死大戰，再者英格蘭將會着起60年代款式全紅戰衣。
據《每日郵報》統計，由BBC直播嘅英格蘭賽事，勝出率為62%，而由獨立電視台轉播的話，勝率只有30%。另外就係紅色戰衣，於頭兩場分組賽，英格蘭都係着起白色球衣上陣，結果兩場都打和。而佢哋希望借助60年代款式紅色戰衣嘅力量，令球隊可以取得更佳成績。歷史上英格蘭曾四度着此款式紅衫比賽，結果取3勝1和不敗紀錄。當中包括62年熱身賽勝秘魯4比0、62年世盃分組賽0比0打和保加利亞而晉級、63年熱身賽以4比2擊敗捷克斯洛伐克。最近一次係70年，英格蘭以3比1輕取比利時。