Ｃ朗終破士哥荒

【本報綜合報道】果然同倒番茄醬一樣！已經十六個月未為國家隊入球的葡萄牙前鋒基斯坦奴朗拿度（Ｃ朗），昨晚世盃對北韓終於入球，而且球隊仲好似Ｃ朗之前所比喻「入波會好似倒番茄醬」，葡萄牙大勝七比○，入球傾瀉而出。

Ｃ朗今場表現其實不俗，下半場先有一腳遠射很接近，可惜中楣彈出，直至完場前三分鐘，當葡萄牙領先五比○，Ｃ朗突破對方防線，皮球彈高，在Ｃ朗後頸及頭頂彈跳兩下，幸好Ｃ朗及時修正，為球隊射成六比○。

至於北韓焦點球星鄭大世，今場表現大為失色，賽前奏國歌時緊閉雙目，再沒有淚流滿面場面，而北韓攻力疲弱，鄭大世原本準備好在入球後才展示的「全國統一」內衣，並無亮相機會。