【本報綜合報道】塞爾特人喺季後賽展開前，冇人睇好佢哋，大部分人都估計東岸冠軍離唔開騎士或魔術，但塞爾特人卻屢創奇迹，先後打敗兩支熱門。不過，「綠軍」最終都係無緣重溫08年奪總冠軍舊夢，現今陣容更有機會解體！
其實塞爾特人「三巨頭」加納特、皮雅斯及雷阿倫嘅時代早已過去，34歲嘅加納特正走下坡，射手雷阿倫狀態飄忽，兩人即使繼續留喺「綠軍」作用亦唔大。至於皮雅斯亦大不如前，今次爭標失敗後，「綠軍」有可能乘機重組。
教練李華士表示：「湖人今場表現相當好，我哋已經盡咗力，更衣室內好多人都忍唔住喊，球季啱啱結束，大部分球員都仲未有打算，不過我知道個別球員，例如拉舒華萊士咁，佢可能會喺季後退役。」