一支籃球隊係五個人落場，即使高比拜仁有幾勁，都要隊友幫忙先攞到冠軍。塞爾特人實力較為平均，板櫈力量亦比湖人強，所以湖人一班綠葉都要發揮超水準，先可支援高比仔，今仗湖人三傑加素、阿堤斯及費沙都表現出色，係致勝關鍵。
積遜教練嘅戰術體系中，必有一位經驗豐富嘅後衞，如以往公牛嘅柏臣、朗夏巴，而湖人就有費沙。35歲嘅費沙人緣極好，當高比仔進攻太任性嘅時候，費沙敢於喺場上直斥佢，呢啲先係真正大佬。佢嘅救命三分球尋日亦發揮功效！
高比仔今仗手風一直唔順，作為湖人嘅第二得分點，加素喺下半場表現稱職，趁塞爾特人中鋒柏堅斯因傷缺陣，頻頻爆籃底，更喺比賽末段搶得一個關鍵嘅進攻籃板，湖人除高比仔外，加素功勞最大。
阿堤斯上幾仗表現一直唔好，因為佢負責看管塞軍射手皮雅斯，已經冇乜餘力進攻。幸好佢今場及時搵番手感，取得全場第二高嘅20分。湖人今季搵佢代替阿里沙，好多人都有微言，但阿堤斯今場表現總算成功平反。