湖人綠軍明晨決生死
昨日嘅總決賽第六回合，湖人返回洛杉磯生猛番晒，主場大勝塞爾特人89比67，場數追成3比3，明早嘅第七回合生死戰，湖人可望乘勝追擊，爭取史上第十六次封王！（高清翡翠台、有線165台及now 671周五早上9時直播）
昨日一戰，形勢非常一面倒，非勝不可嘅湖人，上半場已領先「綠軍」20分，打完第三節，領先優勢已拉開至25分，令第四節大部分時間成為垃圾時間。
奧當回勇吐烏氣
湖人眾主力今場表現相當出色，高比拜仁取得全場最高嘅26分，加素有17分進帳，另外，早前表現低沉嘅阿堤斯及奧當亦回勇，奧當搶到10個籃板，更係總決賽以來最高。
奧當表示：「雖然之前幾場我嘅表現受到猛烈批評，但我今場終於搵番自己，對得住球迷同3,300萬美元嘅合約！」
近期手風相當順嘅高比仔，亦表示好有信心衞冕成功：「我哋冇諗太多，喺第六回合之前，我哋只係諗贏呢場波，贏完之後，就諗再贏多場，就係咁簡單。」
塞爾特人今場慘敗嘅其中一個原因，係中鋒柏堅斯喺第一節就勇戰受傷，佢嘅右膝傷勢頗為嚴重，仍未知能否趕及聽日王者戰上陣。至於湖人中鋒拜林昨仗亦只係上陣16分鐘，積遜教練解釋，由於湖人今場一早將比分拉開，故讓帶傷上陣嘅拜林休息。
本報綜合報道