費沙發威湖人食塞領先2：1
家有一老，果然如有一寶！湖人尋日就係靠陣中年紀最大嘅老將費沙，尾段大發神威連番射入關鍵球，包括最後48秒一記剷籃2+1得分，協助湖人以91比84作客擊敗塞爾特人，總成績領先2比1。成為英雄嘅費沙，賽後接受訪問時一度熱淚盈眶，表現激動。
已經35歲嘅老牌後衞費沙，今季季後賽鮮有佳作，當得悉對手係塞爾特人後，費沙更被大眾睇死，面對大勇嘅朗度隨時成為湖人致命傷。不過，費沙今場旋即用行動證明寶刀未老，雖然前三節表現一般，但佢喺第四節卻及時回魂，連番跳投命中下，助湖人一直處於領先優勢。
贏波英雄 賽後激動
塞爾特人在最後1分鐘內追貼只差4分距離，但費沙連隨引球由後場帶到前場，更無懼「三巨頭」趕到封阻，依然勇敢地剷籃得分，結果畀佢瞓身命中兼博得犯規搶得一記2+1攻勢，間接令塞軍無力翻身，湖人以91比84贏得重要嘅作客勝仗。
費沙全場攻入16分，但單係第四節已獨取11分，成為今場英雄，佢賽後受訪時表現激動：「對唔住，今晚確實係一個神奇嘅晚上，我有啲控制唔住自己嘅情緒！」至於高比拜仁亦屬功臣之一，佢全場奪得29分及7個籃板，其中最關鍵係在防守上完全凍結狀態大勇嘅雷阿倫，後者今場13次起手0中，三分球則8球全失，高比仔絕對功不可沒。
