湖人炒塞攞頭彩
「爆、激、茅」三個字，絕對係湖人對「綠軍」塞爾特人嘅NBA總決賽首回合最好形容詞。呢場萬眾期待嘅決賽，雙方合共出現咗54次犯規，真係似打交多過打波，最終湖人憑高比拜仁同加素合力轟入53分，主場以102:89大勝塞爾特人，先拔頭籌。
兩隊今場共54犯
今場「戰鬥」由開波一刻已火藥味十足，曾喺04年因防守皮雅斯拉甩佢條褲嘅阿堤斯，尋日中圈開波前已經為爭位你推我撞，開波只係27秒，兩個喺籃底爭波爭到手箍手一齊跌落地，結果各被罰一次技術犯規，之後比賽氣氛仍然非常火爆，埋單計數湖人全場有26犯，但仍然比塞爾特人嘅28犯少兩次。
湖人今仗愈打愈起勁，特別係高比拜仁，全場貢獻30分同6個助攻，加素亦有23分同14個籃板球，係湖人贏波嘅最大功臣。反觀塞爾特人全隊只得皮雅斯表現較好，老將雷阿倫更因為嘜唔住高比，搞到個犯纏身，全場只能上陣27分鐘。
對於呢場波打得咁火爆，加素賽後表示係意料中事：「我一早估到呢場波會有好多埋身肉搏。經過連續三年殺入季後賽，我哋完全明白總決賽嘅性質，你一定要比對手夠狼，夠硬淨先可以取得勝利。」
主場首捷8成可奪標
雖然尋日只係今屆總決賽首場賽事，但賽後一切有利數據已經傾向湖人身上，首先近10屆NBA總決賽，首戰喺主場贏波嘅球隊有8次可以成功奪標。另外湖人教練積遜歷來喺季後賽47次贏得系列賽第一戰最後，最終全部勝出。
本報綜合報道