「飛鼠」發威，非同小可！昨日NBA西岸決賽第三回合，太陽憑「小飛鼠」史杜迪米亞大爆發，獨取42分及11個籃板，帶領太陽以118比109擊敗湖人，總比數追成一比二，明早兩隊將進行第四回合賽事，繼續由太陽主場。（高清翡翠台、有線體育台62及165台周三早上9時直播）
「小飛鼠」史杜迪米亞係太陽今場贏波功臣，全場22投14中，再加上14個罰球，取得全場最高嘅42分。湖人前鋒奧當承認守唔住史杜迪米亞係落敗關鍵：「今場實在畀史杜迪米亞太多單打獨鬥嘅機會，而且內線完全失去平衡。」
湖人今仗內線完全崩潰，奧當演出令人失望，全場僅取10分，另外喺第四節佢更六犯離場，美國傳媒早前報道佢比賽前流連夜店，唔知係咪佢今場表現走樣嘅原因，至於中鋒拜林因膝傷關係，只係上陣七分鐘，積遜教練話拜林下場亦未知出唔出得。
雖然湖人表現一般，但主將高比拜仁一樣交出水準，今場貢獻咗36分、11次助攻同9個籃板，差1個籃板就食出「大三元」。
原來高比仔對住太陽特別醒神，之前喺季後賽曾經7次對太陽做出「30+」成績，不過嗰七場賽事，湖人輸咗五場，睇嚟湖人想贏波嘅話，都係唔好畀高比仔攞咁多分。