奧巴馬勸大帝投公牛

在芝加哥圓總冠軍夢

美國總統奧巴馬喺白宮接受訪問時表示，希望勒邦占士去自己愛隊公牛：「戴歷羅斯同諾亞已經組成唔錯嘅核心陣容，如果加埋占士，將會係一個超強嘅配搭，我相信公牛如果得到勒邦占士助陣嘅話，可以攞到總冠軍。」

奧巴馬仲用占士同公牛名宿米高佐敦比較，話佐敦頭七年打ＮＢＡ都攞唔到總冠軍，直至開始信任教練積遜，同搵到柏賓、洛文等「綠葉」，佐敦先可以喺九十年代取得六枚總冠軍指環。

紐約人熱火力邀加盟

占士効力嘅騎士喺今季季後賽被塞爾特人淘汰，令佢再一次冠軍夢碎，由於占士同騎士嘅合約已經屆滿，有報道指佢將於暑假離隊。盛傳紐約人、熱火同公牛都力邀勒邦占士過檔，「大帝」依家仲心大心細，唔知佢會唔會聽奧巴馬話，去伊利諾伊州尋找「第二春」呢？

勒邦占士嘅前途仲係未知數，不過騎士教練米克布朗就盛傳已經被炒魷，不過有消息指有五支球隊睇中佢，相信米克布朗好快就可以脫離失業大軍。