昨日NBA東岸決賽第二回合，「綠衫軍」塞爾特人再下一城，作客以95比92擊敗魔術，總比數領先至2比0，今次係塞爾特人史上，首次連贏頭兩場作客賽事，之後兩場返回主場，睇嚟魔術翻盤嘅機會極微，難怪「巨頭」皮雅斯揚言要贈對手四隻光蛋晉級總決賽！
季後賽表現脫胎換骨嘅塞爾特人，昨仗贏波關鍵唔係進攻，而係防守，之前8場季後賽，魔術每場平均攻入11.1個三分球，但呢兩場魔術嘅三分球完全死火，僅投入5球及7球，而「魔獸」杜域侯活喺內線亦攞唔到任何甜頭。
大前鋒拉舒華萊士表示：「杜域侯活經常利用自己嘅身體優勢，所以我哋防守時唔可以退縮，必要時要利用犯規，另外尼爾遜嘅外投亦要注意，只要守住佢哋兩個，魔術就冇進攻板斧。」
相比魔術，塞爾特人嘅得分點明顯較多，而且唔再集中喺「三巨頭」雷阿倫、皮雅斯及加納特身上，控衞朗度喺季後賽表現大熟大勇，成為球隊嘅進攻主力，朗度昨仗獨取25分、另得8次助攻及5個籃板，而皮雅斯就貢獻28分。
皮雅斯有信心返回主場可連贏兩場晉級：「雖然我哋領先2比0，但絕對唔會鬆懈，返到主場我哋嘅打法會更加進取，喺球迷吶喊助威下，相信可連贏兩場。」
昨仗表現最令人失望嘅球員係魔術「飛人」卡特，佢除咗守唔住皮雅斯，仲喺關鍵時刻射失兩個罰球，心理質素欠佳，睇嚟呢位33歲老將都好難一嘗冠軍夢。
■本報綜合報道