獨眼拿殊領太陽入決賽
每遇馬刺都多災多難嘅鳳凰城太陽領袖拿殊，尋日慘被鄧肯批爆眼角，但堅持「單眼」上陣結果皇天不負有心人，拿殊「單眼」射波仲準過平時，結果尾段發威協助太陽贏107比101，總成績4比0橫掃馬刺晉級，殺入西岸決賽。
爆鼻撞散乜都試過
馬刺與太陽近年在季後賽碰頭，拿殊例必多災多難。○七年季後賽，拿殊就曾被柏加撞爆鼻，賽後縫上六針。及後拿殊又試過被荷利撞到飛去場邊廣告板，又試過被保雲踢傷下體，拿殊早已成為馬刺球員粗暴對待嘅目標。直至尋日亦未能幸免，拿殊在第三節防守鄧肯時，被後者手㬹批爆右眼角血流披面，退下火線止血。
藉拿殊傷出後，馬刺隨即打出一段11比0攻勢並追成平手，幸好拿殊經過數分鐘治療後，第四節可重新回到賽場，不過右眼已經睜唔開。殊不知「單眼」嘅拿殊射波仲準，單節已攻入10分，最終助太陽以107比101擊敗馬刺，繼06至07球季後再次殺入西岸決賽。
今場攻入20分及9次助攻嘅拿殊賽後表示：「我右眼睜唔開，當時已經睇唔到嘢，不過一隻眼已經足夠。」至於史杜迪米亞亦攻入29分，同屬贏波功臣。不過馬刺主將柏加輸波後亦不失風度：「出局的確令人傷感，但同時間我亦為拿殊及史杜迪米亞感到高興，因為我好清楚佢哋每季都好落力去爭取成績。」
本報綜合報道