高比超天鈎湖人3弄爵
經過對上兩場屯重兵力喺內線贏波後，湖人昨晨作客爵士改變策略，側重外圍進攻果然奏效，喺全場射入13個三分波之下，加上「絕對領袖」高比拜仁喺最後一分鐘領軍打出一段８比２嘅攻勢，「紫金兵團」終驚險地以111比110攻陷敵陣，領先場數拋離至３比０，闖西岸決賽呼聲極高。而高比仔更超越「天鈎」渣巴，成為球會史上季後賽入波王！
湖人今季已係連續三年在Playoffs碰上爵士，但對上兩次均在Game 3觸礁，今年終於打破呢個「樽頸位」。湖人贏波之道，在於「識轉膊」，尋日佢哋嘅內線球員拜林、加素及奧當雖然受到主隊嚴密看管，但當家球星高比拜仁發揮高水準射入35分，而且湖人一搵到機會就射三分波，其中阿堤斯及費沙嘅三分波頻頻得手，最終助湖人以一分之微險勝爵士。
魔術亦領先鷹隊3:0
另一樣值得高比仔自豪嘅，就係佢喺季後賽已累積射入1,649球，打破由渣巴保持嘅1,643球紀錄，成為湖人史上季後賽入波最多球員！其實昨仗雙方爭持激烈，共８次打和、22次交換領先，連高比仔賽後都忍唔住話：「睇到咁激嘅比賽實在太正！一個又一個嘅射球，一次又一次快速進攻，能夠置身其中確實好玩，當然球隊贏波就更重要。」
東岸４強方面，鷹隊雖有主場之利，但仍然找不到克制魔術中鋒杜域侯活嘅辦法，昨仗再被杜域侯活取得21分及16個籃板，魔術最終大勝105比75，同樣領先至３比０，晉級東岸決賽在望。
■本報綜合報道