騎士輕鬆起塞
縱然「大帝」勒邦占士踏入季後賽次圈後，一直飽受右肘傷患影響，不過傷勢似乎阻唔住「大帝」爆發，尋日作客波士頓首節已怒轟21分，協助騎士打出絕佳開局下，以124比95大勝塞爾特人，總成績再度領先2比1，總算搶回主場優勢。
自首圈弄傷右手肘後，占士在今個系列賽中一直飽受傷患影響，賽前更要做多一次檢查，才可確保出戰。但騎士迷似乎毋須再為占士擔心，皆因「大帝」輕而易舉克服傷患問題，今場首節已打足12分鐘，並極速入局10次起手中8球，罰球5射5中下單節轟入21分，助騎士取得19分領先優勢。
感染隊友早奠勝基
因早早奠定領先基礎，騎士餘下時間亦打得相對輕鬆，去到第四節，塞爾特人追分無望下，兩軍亦陸續讓主力休息，最終騎士大勝124比95，總成績領先2比1。全場攻入38分、8個籃板及7次助攻嘅占士賽後表示：「我聽到好多人在討論我嘅傷勢，但我嚟到係要比賽同取得勝利！」至於教練米克布朗就表示：「好開心見到占士能夠準繩跳投，結果其餘隊友都被佢感染到。」至於第四回合，將會在周一凌晨上演。
阿堤斯微博起風波
另外，據《ESPN》報道，一個疑似屬於湖人前鋒阿堤斯嘅微博帳戶RONARTESTCOM，日前發表了不滿教練「禪師」積遜嘅博文，但阿堤斯其後卻否認戶口屬於自己，並表示遭人惡搞，佢對教練並冇任何意見，而「禪師」表示會向阿堤斯了解事情。
本報綜合報道