三巨頭弒帝

拿殊佳作領太陽拔「刺」

雖然「大帝」今場續有上佳演出攻入24分，可惜其他隊友大跌Watt，尤其一眾外線射手，莫威廉士全場9次起手僅中1球得4分、安東尼柏加7次起手只入2球得6分，而另一射手韋斯上陣31分鐘僅得4分，三大外投手都失準，成為騎士輸波致命傷，「大帝」雙拳難敵「三巨頭」。

塞爾特人「三巨頭」輪流得分，雷阿倫攻入全隊最高22分及7個籃板，而加納特就貢獻「雙雙」18分及10個籃板，另外，皮雅斯亦聯同朗度、拉舒華萊士及柏堅斯齊齊獲得雙位數字得分，令騎士防不勝防。功臣雷阿倫賽後忍唔住一吐烏氣：「我知道好多人都話球隊老化，就連波士頓傳媒都咁講，不過我唔會理呢種言論，我只會與隊友一齊奮戰到底！」至於輸波嘅占士，賽後話唔會搵手肘受傷作輸波藉口，並揚言下場一定贏番「綠衫軍」。

西岸方面，太陽憑老將拿殊轟入33分並交出10次助攻，主場以111比102擊敗馬刺，次圈先拔頭籌。其實拿殊近日一直飽受臀部傷患困擾，但今場卻忍痛打出今季季後賽代表作。另外，剛在首圈出局嘅公牛，正式辭退教練迪尼高，但仍在物色新教頭。

本報綜合報道