公鹿反先3:2獵鷹在望
先後有兩大主力米高列特及波格特提早收咧嘅公鹿，尋日再度到訪亞特蘭大，球隊喺最後關頭打出一段14比0攻勢，最終以91比87反勝鷹隊！公鹿連追三場後總成績亦反先3比2，只要明早返主場再贏一仗，就可以晉級次圈挑戰東岸二哥魔術。（now 670周六早上7時直播）
雖然沒了年薪達到1,700萬美元嘅「夢八」射手米高列特，又缺少狀元中鋒波格特，但公鹿喺今季季後賽依然發揮超水準，尋日作客鷹隊大半場落後之下，喺賽事剩餘4分鐘內突然打出一段14比0攻勢，一舉反超分數，最終真寧斯尾段憑數個罰球鎖定勝局，總成績領先3比2，出線在望。
攻入全隊最高25分嘅真寧斯，賽後話贏波關鍵在於「鷹王」祖莊遜六犯提早離場，如今壓力已喺晒鷹隊，佢相信公鹿下仗可以淘汰對手。
另一邊廂，面臨淘汰邊緣嘅金塊，則成功在「生死戰」以116比102擊敗爵士，總成績追貼2比3，保留一線希望。
高比壓大帝蟬聯賣衫王
此外，NBA亦公布了今季「賣衫王」寶座，湖人當家球星高比拜仁力壓「大帝」勒邦占士，蟬聯單季個人球衣銷量冠軍，而加納特，戴歷羅斯及杜域侯活分列三至五位。至於球隊商品銷售量，湖人近八季內第七次居首，宿敵塞爾特人緊隨其後。