高比唔知搞乜鬼？
高比仔夢遊累湖人輸波！昨日NBA衞冕總冠軍嘅湖人，作客以89比110被雷霆爆冷擊敗，連輸兩場後，畀雷霆總場數扳成2比2平手。高比仔全場僅得12分，風頭畀新鮮出爐嘅常規賽「得分王」杜蘭特搶盡，估唔到呢場第一對第八之戰，作為西岸一哥嘅湖人完全佔唔到上風。
高比拜仁今場表現異於平常，全場僅起手10次，成個第一節竟然冇起過手，直至完半場前9分鐘先第一次投籃，高比仔對上一次喺季後賽出手咁少，已經要追溯到十年之前，而季後賽得12分，亦係高比仔近6年新低，好多人都想知高比仔究竟搞乜鬼！
雷霆追平2:2 杜蘭特信心爆棚
據美國傳媒分析，早已領先2比0嘅湖人今場主要輸輕敵，而且因為開局開得唔好，當早段落後，球員嘅集中力全失，罰球命中率僅得六成，反觀雷霆罰球48投42中，係今場勝負嘅關鍵。
另外，首次打入季後賽嘅雷霆，亦得到主場球迷嘅熱烈支持，球迷着住白色T恤打氣，高呼「Beat LA」。雷霆總場數追平2比2後，初生之犢不畏虎嘅主將杜蘭特，表現愈來愈有信心：「我哋訓練好刻苦，即使對手係湖人，我都有信心可以取得好成績！」
本報綜合報道