湖人齊腳收雷霆學費

【本報綜合報道】上季NBA總冠軍湖人將在周一凌晨展開衞冕之路，首戰主場撲擊雷霆。湖人賽前收到大好消息，「周身傷」嘅高比拜仁已復操，可與雷霆嘅新任「得分王」杜蘭特鬥飆分；至於缺陣季尾十三場常規賽嘅「小鯊魚」拜林，亦重返訓練營。湖人人腳齊全下，相信首戰可輕鬆擊敗缺乏季後賽經驗嘅雷霆。 （周一凌晨3時開賽）

湖人季尾成績滑落，不少人批評呢支衞冕總冠軍欠缺穩定性，比起上季似乎有退步迹象，但須知「紫金兵團」飽受傷患困擾，當家球星高比拜仁除長期受到右手指傷影響，右膝及足踝都有傷，所以季尾五場都迫於無奈休戰四場，幸好高比已經傷愈復出，佢話：「經過數天休息後，感覺非常良好。」

太陽可勝殘陣拓荒者

湖人今季四對雷霆擁三勝一負佳績，明顯佔優，加上球隊經驗老到，估計首圈好難遭遇滑鐵盧，雷霆都係要交吓學費先㗎啦！

另一場西岸賽事，就到「三哥」太陽主場迎戰拓荒者，客隊飽受傷兵困擾，最慘情係領袖萊爾季尾先受傷要做手術，殘陣嘅拓荒者點都惡唔出樣，首圈止步機會極高。（有線165台及體育台62周一早上10時30分直播）