能否搭上尾班車出席季後賽，主導權喺晒公牛手上！只要佢哋今朝能夠順利擊敗塞爾特人，繼而在煞科日作客搞掂山貓，就毋須理會速龍，肯定奪得東岸第八。現時公牛士氣正盛，一眾生牯仔戴歷羅斯、諾亞及鄧格打起晒信心，聽朝對山貓勝算較高。（有線165台周四早上8時直播）
雖然表面上公牛形勢較佳，但基於球隊在對賽戰績不及速龍，所以餘下兩戰都不容有失。幸好公牛煞科日對手只係山貓，後者尋日擊敗籃網後已鐵定以東岸第七位過終點，季後賽首圈將會面對魔術。
因此預計經驗老到嘅山貓教練拉利布朗，煞科日都唔會用殘班主力，好讓佢哋養精蓄銳鬥魔術，變相放生公牛。至於公牛近況亦信得過，未計今日成績在內，球隊近六戰贏咗四場，其中關鍵之戰贏速龍更加打出士氣，諾亞與戴歷羅斯都愈見大將之風，相信今日可以輕易擊敗打風流波嘅山貓。