登陸NBA六載，山貓今季終嘗夢寐以求嘅季後賽滋味，其實山貓能夠寫下歷史，真係要多得老闆米高佐敦，「波神」近季為球隊作出多個明智決定，最關鍵莫過於簽入史堤芬積遜，呢個「浪人」加盟後即助球隊戰績飆升，令山貓成為實力分子。
米高佐敦自從入主山貓後，多年來被批評缺乏眼光，經常入錯貨，其中06年選秀會以三號籤揀中水貨阿當摩利臣，就成為球迷多年笑柄。幸好「波神」未有因此氣餒，上季先請來名教練拉利布朗，令球隊戰績提升，今季換入史堤芬積遜及特魯斯湯馬士，兩單交易都獲得好評，證明「波神」眼光愈來愈準。
史堤芬積遜一直被認為名大於實，近年屢成「人球」。但佢加盟山貓後，經過拉利布朗嘅調校，加上有謝勒華萊士為佢開山劈石，結果呢位「浪人」鹹魚翻生，打出個人職業生涯最佳一季，上陣時間、得分及籃板都創新高。