季後賽新貴大特集

雷霆土炮成長大躍進

雖然雷霆前身西雅圖超音速過往屬於季後賽常客，但球隊自從08年搬往俄克拉荷馬城，並改名為雷霆後，就未嘗過季後賽滋味。雷霆今季成績大躍進，全因三大「自家出品」杜蘭特、謝夫格連及韋斯布克茁壯成長。

雷霆上季仍屬一支魚腩部隊，常規賽成績為23勝59負，得勝率連三成都冇，但勢估唔到今季竟然大翻身，暫時成績為49勝31負，贏波場次已較上季多出一倍有多。球隊最令人驚訝之處係今季無論正選球員定教練，人腳同上季都一樣，戰績飆升全靠幾位主力嘅進步及成長。

最明顯莫過於三年生杜蘭特，此子今季強化身體素質後，在各項數據都大幅提升，現時已在得分榜力壓勒邦占士、安東尼及高比拜仁等超級巨星，大有機會奪得生涯首個得分王寶座。