勢壓綠軍做三哥 鷹揚東岸
東岸騎士、魔術穩居常規賽首次席，季席之爭卻異常激烈。異軍突起的鷹隊昨日憑哥羅福又射入「4分波」（3分中籃兼入罰球），作客以105:95輕取巫師，目前以一場優勢領先前屆總冠軍「綠軍」塞爾特人。兩軍各餘下兩場賽事，結合對手實力及本身狀態，睇嚟鷹隊好大機會做三哥！
鷹隊尋日贏波，第六人哥羅福絕對居功至偉，佢繼上場用招牌絕技「4分波」打贏速龍後，尋日朝早對巫師故技重施，職業生涯第28次射入「4分波」，將呢項NBA紀錄進一步延伸，難怪被捧為今季「最佳第六人」獎項頂頭大熱。
哥羅福熱爆最佳第六人
小牛嘅泰利、金塊嘅JR史密夫同太陽嘅菲爾都被視為今季「最佳第六人」嘅熱門人選，不過鷹隊中鋒荷福特就為隊友拉票：「哥羅福絕對會當選最佳第六人，呢一點係毋庸置疑，佢全季嘅出色表現應該獲得肯定。」
目前鷹隊與塞爾特人各餘兩場，前者餘下對手分別是公鹿及留力的騎士，要全勝不難。但「綠軍」下仗要硬撼力爭季後賽尾班車的公牛，相信鷹隊好大機會壓過塞爾特人，成為三哥。
本報綜合報道