湖人騎士鬆章金塊公牛齊多謝

【本報綜合報道】金塊同公牛尋日真係要同對手教練講聲Thank You！皆因兩軍對手湖人及騎士，竟然臨場收起高比拜仁同勒邦占士兩大球星，結果梗係益晒金塊同公牛一齊贏波，金塊贏波後重返西岸第二，公牛就追平速龍戰績，有望搭上季後賽尾班車。

占美臣傷腳要抖抖

已穩奪常規賽冠軍嘅騎士，餘下常規賽都屬風流波，球隊就收起「大帝」勒邦占士，以免佢季後賽前受傷。雖然騎士有莫威廉士射入今季新高35分，但因華拿祖最後關頭兩射不中，結果騎士以108比109不敵公牛，騎士大前鋒占美臣更喺比賽中整傷右腳，嚟緊對溜馬應該會避戰，以免加劇傷勢。而公牛主將戴歷羅斯、軒域治與鄧格分別有24、23同22分進帳。公牛贏波後戰績為38勝40負，追平排喺東岸第八嘅速龍。

至於贏多一場就穩奪西岸冠軍嘅湖人，尋日亦將高比拜仁收起，結果力爭以二號種子出席季後賽嘅金塊把握良機，憑安東尼攻入31分，加上完場前成功封走費沙射波，主場以98比96險勝湖人。