K教練率公爵4度登基
今場比賽萬眾矚目，兩隊亦打得緊湊，上半場公爵只以33比32領先對手，下半場雙方繼續拉成均勢。完場前一秒，落後兩分嘅畢拿由希獲特遠射三分作最後一擊，但隨住呢球射失，畢拿今季傳奇之旅正式落幕。
公爵主帥「K教練」克爾澤維斯基第四次帶領球隊喺NCAA封王，亦係史上第三位曾取得四次或以上NCAA冠軍嘅教練。早前有傳籃網想用全NBA最高年薪力邀呢位名帥出手打救球隊，不過佢就話冇意做救世主：「從未有人接觸過我，而且我對執教籃網毫無興趣。」現時同時擔任美國夢幻隊主帥嘅「K教練」，已簽下合約帶領球隊出戰2012年倫敦奧運。
本報綜合報道