西岸亂戰鬥避湖人

目前西岸除湖人遙遙領先外，其餘七隊得勝率都好接近，第二位嘅小牛，同金塊、爵士及太陽更一樣係50勝27負，與第八位嘅拓荒者亦只差三場勝仗，所以嚟緊每場勝負，都足以影響各隊季後賽排名。如果只能以第八名包尾晉級，首圈將硬撼衞冕總冠軍湖人。

正因為咁，所以聽日太陽對馬刺，以及雷霆對金塊兩場大戰都好關鍵。當中太陽同馬刺近期都着晒火，雙方嘅中鋒史杜迪米亞同鄧肯亦有上佳演出，勝負好大機會取決呢個「match up」！不過太陽始終有主場，可睇高一線。