高比續約3年袋7億
【本報綜合報道】高比拜仁續約湖人三年！湖人尋日透過官網宣布，成功同當家球星高比拜仁續約三年，後者會留効至2014年，雖然細節未有透露，但多家媒體均估計合約總額達到9,000萬美元（約7億港元）！而湖人同日亦以106比92擊敗爵士，繼續穩坐西岸一哥位。
湖人總經理葛查克透過球隊官網發表消息，湖人已成功與高比拜仁續約三年，佢話高比仔係湖人近十年最重要嘅球員，帶領球隊四奪總冠軍及數不盡嘅榮譽，所以湖人非常高興能夠與高比仔達成協議，順利完成續約。不過，葛查克並冇透露合約內容，但據多家美國媒體透露，三年合約總額達到9,000萬美元，其中ESPN指出，高比拜仁2011至12年薪金為2,740萬美元、2012至13年為3,020萬美元，而最後一季就超過3,200萬美元。
騎士首隊60勝
高比仔今季薪酬為2,300萬美元，僅次麥基迪屬NBA第二高薪，不過佢下季薪酬為2,480萬美元，將成NBA「打工皇帝」。若然高比仔完成今次新合同，其累積總薪酬將為約2.86億美元（約22.2億港元），在NBA歷史中僅次於加納特嘅約2.91億美元（約22.6億港元）總薪酬。而湖人同日亦靠高比仔射入25分，奧當貢獻26分，以106比92擊敗爵士，避免常規賽三連敗。
同日騎士以93比88擊敗鷹隊，成為今季首支60勝球隊，鎖定為今季常規賽東岸冠軍，而騎士今晚將會應付「東岸大戰」，作客對塞爾特人。（無綫明珠台周一凌晨1時直播）
