韋迪爭仔有排煩

「閃電俠」韋迪前妻施奧雲恩，當年發現「閃電俠」背住自己偷嗒荷里活影星Gabrielle Union，○七年決定斬斷情絲，而離婚後兩名兒子一直與佢同住。不過，施奧雲恩離婚後不斷向傳媒抹黑韋迪，包括話佢傳染咗性病畀自己，又指摘「閃電俠」離婚後冇盡過爸爸責任，一眼都冇望過兩個仔，搞到韋迪忍無可忍終作反擊。

入稟法院話前妻患精神病

韋迪日前入稟法院，追討兩名兒子嘅全面撫養權，理由係施奧雲恩精神有問題，言行不負責任及經常講大話，而最重要係兩名兒子喺爸爸撫養下，一定可以健康快樂咁成長。韋迪在訴訟中指，自己一直好關心兩個仔，只係施奧雲恩及其家人阻止佢探訪，所以要求法院同前妻做一次精神檢查，因為佢懷疑前妻已患上精神病。案件將於六月開審，屆時或會影響韋迪嘅安排，因為美國男籃屆時將到土耳其參加世界錦標賽。