ABC防中梅示敦

記：記者　黃：黃興桂　梅：梅示敦

記：不如先講吓你哋點認識？

黃：其實我都係上年先識阿Lex，有日收到侯澄滔電話，即係五六十年代東方三劍俠之一，佢話有個世姪想嚟香港落班，所以我就飛返香港幫手。

梅：（用半鹹淡廣東話）係呀，我同Peter叔素未謀面，但佢都不辭勞苦咁幫我。

黃：都要你係好嘢，我先會幫。當時我約佢踢咗三場波，因為我要肯定佢有質素，先可以介紹畀人。你唔好笑呀，雖然我老，但踢嘅衞生波唔講得笑，連金牌門將葉鴻輝都有join我哋㗎。

三場波睇到似馬基列尼

記：就係呢三場波，你就決定幫佢？

黃：冇錯，我覺得佢係馬基列尼型球員，人仔細細但防守出色，夠拚搏、有體能、工作效率強，夠晒料立足香港球壇。之後我就親自打電話，推薦佢畀幾家球會。

梅：嗯，我好記得嗰時到沙田試腳，Peter叔驚我唔識路，就山長水遠陪埋我去。可惜因為我係美籍，但又係華人，所以好多球會都因為咁而唔考慮。

黃：都荒謬，乜香港啲外援好高質素咩？點解黑皮膚就代表好波過黃皮膚先！依家又唔係叫你畀幾萬蚊人工，我覺得佢好過好多外援啦，只係好多香港教練唔懂得用防守球員。

重慶大廈 噩夢一場

梅：好彩，最終都獲得大中賞識，實現落班夢。不過有件事好難忘，因為我喺紐約時上網搜尋到重慶大廈房租平，所以我就住咗一個禮拜，但最後都頂唔順搬走咗。

黃：梗係啦，你屋企個廁所都大嗰度幾倍啦！

記：Lex，踢咗港甲半季，感覺如何？

梅：無可否認，香港足球嘅設備或聯賽水平都唔算高，要知道美國從學院開始，訓練系統已好完善，球迷亦較為投入。不過香港亦有唔少球隊具質素，好似傑志，而大中就夠團結，隊友關係好融洽。

記：咁同邊個最老友？

梅：其實個個都好friend，因為我係大中嘅翻譯員，教練好多時都透過我同外援解釋佢哋嘅要求，自然熟落。至於年輕球員亦玩得埋，好似盧俊傑同吳國熙等，早前就齊齊幫我搬屋。

記：踢完今季後，會唔會繼續留港？

梅：未知呀，始終自己未站穩正選位置，唔排除會離開。不過現時唔會諗太多啦，餘下半季會專心訓練同比賽，就算他朝返回美國都要無憾。

梅示敦Profile

Lexton Moy

國籍：美國　年齡：25歲

出生地：紐約　球會：大中

位置：中場

圖、文：梁嘉輝