永倫喺上屆季中由南韓邀請咗前亞運金牌得主申東燦執教後，成班大牌球星畀呢位「魔鬼教練」操到弗晒之餘，自信心仲返晒嚟，好似食咗「爆漿瀨尿牛丸」咁攞晒甲一男籃常規賽同埋季後賽冠軍！今季申東燦再度回歸永倫，本報亦成為第一支獲批准拍攝佢特製地獄式訓練嘅採訪隊，而睇完呢三個鐘頭訓練之後，見到成班球星畀佢操到爆偈、兼面容扭曲，小記深深咁體會到「一分耕耘、一分收穫」！
申東燦載譽回歸
上年永倫大事擴軍，竟然喺銀牌賽輸畀南華屈居亞軍，所以班主許業榮就動用「人情牌」，由南韓請嚟籃協技術委員申東燦幫手「執一執」，結果佢成功點石成金，利用嚴厲操練將一班早已上位嘅球星操弗晒，仲攞埋「雙料冠軍」威到盡！不過，由於申東燦本來就係隸屬南韓籃協，球季一完就「嗱嗱臨」趕返祖家，所以今季會唔會返嚟就引來唔少揣測！
結果，喺二月初舉行嘅工商盃決賽，缺少咗申教練帶領嘅飛飛（永倫別名）就輸咗畀南華，但原來咁啱申東燦就喺嗰幾日返咗嚟，而為免影響球隊部署，所以場波佢就做住「座上客」先！但係眼見球隊再次「打回原形」輸畀南華，申教練隨即制訂咗一系列地獄式訓練，務求再次操番弗呢班球星。
操到抽筋兼變樣
本報喺上個禮拜獲得申教練「破例」採訪球隊嘅閉門操練，見證咗呢個每星期四次、每次三個鐘頭嘅「體能地獄」，只見當打嘅周迎堅、香振強、潘志豪等仲勉強捱得住，但已年屆三十五嘅中鋒蔡芳裕就經已面容扭曲，到最後仲冇晒力只能喺地上爬行。
雖然訓練內容係不斷重複做啲「基本嘢」，甚至悶到抽筋，但新加盟球隊嘅葉嘉浩同埋蘇伊俊就話好有用：「真係好辛苦，但比起一啲喺日頭要返工，夜晚要操波嘅隊友，自己冇理由捱唔到，我哋相信汗唔會白流。」依家所有永倫球員都將自己所有工餘時間畀晒訓練，佢哋都講笑咁話：「呢幾個月我嘅人生就只有返工同埋籃球！」
申東燦
國籍：南韓 年齡：53歲
威水史：
球員——82年亞運金牌、78年亞運銀牌（南韓）
教練——95年全國高中賽三冠王（景福高中）
09年甲一常規賽及季後賽冠軍（永倫）
銀牌籃球賽今晚賽程
7:00pm 福建Vs遊協
8:30pm 永倫Vs安青
地點：灣仔修頓室內場
票價：30元、長者及學生20元
■圖、文：司徒子文、Carrie