本文重點
【本報綜合報道】「巨無霸」或緣盡常規賽！上周五勇戰受傷嘅騎士中鋒奧尼爾，經檢查後證實右拇指傷勢頗為嚴重，要施手術治療，預計要抖六至八個星期，由於常規賽只係剩番七個禮拜，睇嚟奧尼爾要喺季後賽至可復出。不過唔使驚，因為舊將「大Z」伊高斯卡斯，可能喺三星期後以自由身重返騎士！
奧尼爾今次傷嘅右拇指其實係舊患，早喺佢初出道時，曾經因為右拇指韌帶撕裂而缺席二十二場比賽，估計今次傷勢會令佢錯過騎士餘下常規賽，奧尼爾缺陣期間，騎士暫由巴西球員華拿祖擔任中鋒。
伊高斯卡斯歸心似箭
此外，騎士早前以伊高斯卡斯交易巫師嘅占美臣，但騎士得到占美臣後，巫師卻放棄伊高斯卡斯，目前伊高斯卡斯係自由身，雖然小牛、金塊、爵士及鷹隊均希望簽佢，但據內部消息傳出，指伊高斯卡斯已決心重返騎士。湖人教練「禪師」積遜坦言騎士同伊高斯卡斯夾埋喺度「做戲」，走法律罅實在可恥！