昨日係高比仔復出第四場比賽，但除咗首仗對灰熊表現出色，射入壓哨球助湖人贏波外，其餘三場表現都平平。對金塊一戰十七投僅得三中，連續三場得分唔超過二十分，睇嚟高比仔嘅傷勢仲未完全復原。

湖人喺第三節一度落後十一分，全靠奧當喺第四節大發神威，取得今場二十分嘅其中九分，先助湖人反勝，不過湖人昨日表現最出色嘅球員係小前鋒阿堤斯，佢不但射入四個三分球，而且全場凍結對方主將安東尼，令安東尼全場有八次失誤，命中率僅得37%，仲要喺比賽最後兩分鐘六犯離場。

阿堤斯展瘦身成效

阿堤斯表示近日狀態當弗：「我狂操體能，短期內減咗十三磅，大概二百五十磅左右，近幾場嘅比賽感覺非常好，我有信心可持續到季後賽。」

積遜教練今季放棄阿利沙簽入阿堤斯，就係睇中佢嘅防守能力，喺季後賽可大派用場，凍結安東尼或勒邦占士呢啲超級球員。高比仔對阿堤斯亦讚不絕口：「佢無時無刻為球隊付出一切，今場佢打出身價波，有佢喺度湖人奪標機會大增。」

■本報綜合報道