本文重點
【本報綜合報道】今季傷愈後一直被火箭教練阿杜文投閒置散嘅「T-Mac」麥基迪，改投紐約人即以表現證明身價。雖然佢首披紐約人戰衣未能助新東家贏波，但佢面對雷霆全場十七射十中並攻入廿六分，已代表昔日得分王仍然分量十足，麥基迪賽後更表示，下季希望留隊，並重披１號戰衣。
眾所周知紐約人換入麥基迪嘅最大目的，就係貪佢份合約即將到期，下季可以有更多薪酬空間去羅致如勒邦占士等猛將。雖然如此，但教練迪安東尼仍給予充分機會「T-Mac」，今場更委派佢出任正選，要知麥基迪對上一次打正選已經係376日前嘅事。
結果「T-Mac」並冇令主場球迷失望，上半場十二射七中攻入十九分，完全冇受雪藏影響。但畢竟麥基迪久未有正式比賽，迪安東尼第三節中段讓其休息，一抖就係十分鐘。及後雷霆在尾段追平並需要加時作賽，「T-Mac」在加時階段上陣機會唔多下，紐約人以一一八比一二一不敵雷霆。
望重披１號戰衣
雖然轉會後首戰輸波，但「T-Mac」卻贏盡掌聲，上陣卅二分鐘十七射十中攻入廿六分，另有四個籃板球及五次助攻，難怪紐約人球迷在加時階段均高呼「We Want T-Mac」！麥基迪賽後表示：「我冇諗過紐約人球迷會對我咁熱情，不過我冇受傷，只係久疏戰陣在尾段先列後備。我希望能夠繼續保持活力比賽，並於下季重披１號球衣。」現時紐約人嘅１號球衣主人係控衞杜漢，不過除非麥基迪願意下季大幅減薪，否則銳意大搞嘅紐約人應該都唔會留用佢。