眾所周知，紐約人可以講係「大帝」嘅私房菜，不論主場定作客，只要佢見到紐約人嘅徽章，就會打出超水準兼狂飆分！尋日亦唔例外，占士單喺上半場已經攻入卅五分，助騎士半場領先紐約人廿分之多。但客隊及後乘住騎士有所鬆懈，下半場逐步拉近距離，尾段更一度逼至僅落後三分，不過占士喺關鍵時刻又發神威，在最後分零鐘時射入兩記重要投射，再度拉開優勢，最終贏一一三比一○六。

奧尼爾都交足功課

轟入四十七分嘅「大帝」賽後表示：「有啲事情好難解釋，我都希望每場比賽都好似今日一樣有出色表現，但肯定冇可能，今日係一個絕佳嘅時刻。」的而且確，「大帝」每次面對紐約人都有「上身」演出，上年十一月對賽時攻入四十分、一月時轟入五十二分兼取得「三雙」，而○八年三月就獨取五十分、○七年十一月就試過射入四十五分，數據絕對驚人，紐約人真係見到佢都驚。

除咗占士之外，另一星級戰將奧尼爾亦有上佳演出，佢為球隊貢獻咗十九分同三次封阻，同樣係贏波功臣。奧尼爾賽後就笑言，佢眼見勒邦占士咁弗，比賽時就叫佢攞夠六十分，以激勵「大帝」士氣。

■本報綜合報道