身為林大輝中學校監及校董會主席，訪問在其辦公室進行。牆上擺滿各式各樣足球獎牌、獎座，足球，的確是他的生命。「我年幼時就醉心足球，因為身材高大，故踢中堅。一直想當職業足球員，但一來球技一般，二來中四開始近視加深，童年夢想由此破滅。踢唔成波，咪搞波囉！」
九四年卅四歲，林大輝年少氣盛，掟錢豪搞流浪眼都唔眨，那時目標清晰，就是要贏冠軍。「當時好勝心強，球隊踢得曳唔緊要，但一定要贏，一定要打敗東方、南華！」經過流浪、愉園光輝時代，蟄伏七年再戰江湖入主沙田，林大輝絕對稱得上近代香港球圈其中一位代表人物，對本地波當然感受至深。談起球圈風起雲湧，他雖然說話時面不紅、氣不喘，卻字字鏗鏘、句句有力。
「今日足球圈，可謂完全失敗。本地球迷極多，但入場睇波來來去去得幾百人。政府近十年投放唔少資源落球圈，但回報根本不成正比。要搞好球市，政府一定要起帶頭作用。冇理由吓吓要球迷山長水遠入小西灣睇波啩？球場設施、配套都未搞好，點吸引球迷睇波？」
唔係牙擦，我對本地足球真係有代表性
港足東亞運奪金犀飛利，政府矢志搞好本地足球，最近的足球發展計劃，卻沒有找林大輝詢問意見。「可能佢哋冇當我係圈中人，當權者唔熟球圈，眼中只有目前那幾位當紅班主罷了，哈哈。唔係牙擦，我對本地足球真係有代表性，至少我可以代表某部分聲音。有心發展球圈當然好，但只有誠意係唔夠嘅，流於口號就更無謂，不去切實執行，又點見到曙光？」
或者有一日本地不會再有球市！
提到足總，林大輝語重心長，「球圈一池死水，足總係時候徹底檢討。在位者全都係聰明人，有心做點會想不出方法？首先佢哋要放下個人利益，不作權力鬥爭，以球圈整體利益為大前提。足總真係要痛定思痛，不然問題如雪球般愈滾愈大，或者有一日本地不會再有球市！」
對本地球員，林大輝痛心疾首：「香港球員，其實舒服到暈。話晨操晚練，其實只得個晚練，一日工作三小時。我雖然身為班主，但整個球圈風氣如此，我想改變亦無能為力。佢哋唔當自己職業球員，付出唔夠，水準自然低落。佢哋只當係job（工作），唔係career（事業）！」
那如何改善球圈？「政府絕對責無旁貸，搞好配套之餘，仲要帶起整個體育文化，辦多啲國際足球運動，創造理想環境讓有心人搞波。當然，足總、班主、球隊、球員、球迷都要努力，方可見到未來。」
撰文：吳浩然 攝影：黃兆崑