本文重點
兩位○三年黃金一代成員韋迪及勒邦占士，尋日又再正面交鋒，「閃電俠」韋迪重複上月對騎士嘅過失，下半場竟突然「啞火」表現大跌Watt，最終騎士輕鬆以102比86擊敗熱火，寫下10連勝，創下今季最長連勝紀錄之餘，更成為首支球隊獲得「40勝」！
兩軍剛於上月尾交手，當時因為韋迪在下半場失準兼犯下多個嚴重失誤，導致熱火以1分落敗，估唔到「閃電俠」今場竟會重複犯錯，佢上半場手感唔錯14射8中，可惜踏入下半場，頭9次投射都「炒粉」，第三節更一分未得，最終騎士就係憑下半場發力拋離比數，以102比86贏波。
快艇教練「升神枱」
今場熱火致敗另一原因係睇唔住「大帝」勒邦占士，呢位紅人睇穿熱火內線積弱，經常爆入籃底取分或博犯規，全場博到21個罰球，並射入17個，而全場就攻入36分之多。至於騎士另一位功臣就係後備兵吉遜，呢位控衞因為要陪伴懷孕太太檢查，所以較遲才趕到球場，但佢落場後卻連番射入三分球，協助騎士拉開優勢。
另方面，快艇教練米克鄧利維決定辭退教練一職，但會續擔任總經理，專心為球隊作管理及球員交易等職務，球隊由助教曉士暫代主教練一職。
■本報綜合報道