奧尼爾花弗創意無限

「巨無霸」奧尼爾雖然已婚，但一向唔安分，鍾意搞三搞四，更被踢爆搭上華盛頓巫師「狂人」亞連拿斯嘅老婆羅拉，大搞婚外情。奧尼爾對於座駕，亦不甘平凡，除咗會喺車身上噴上名字或綽號外，亦喜歡改裝車輛，甚至曾經同福特車廠合作，生產屬於個人品牌嘅「Shaq SST」新型旅行車。

自設品牌Shaq SST

奧尼爾無論球場內外，都創意無限，對於自己座駕，亦要親自設計一番。佢先後擁有超過四十四架車，包括悍馬、福特、平治開篷CLK、法拉利。雖然呢批名車性能優良，裝置齊備，但都滿足唔到奧尼爾嘅要求，佢總要自行改裝，甚至要設計一款屬於自己獨有嘅愛車。

奧尼爾於是同福特車廠合作，使出平生絕學，打造出名為「Shaq SST」嘅旅行車，而且限量生產，全球只有五百架，非常珍貴。佢自己嗰架就編號「34」，因為當時効力湖人嘅佢着34號球衣。

舒麥加專一獨愛法拉利

「德國車神」舒麥加出名對太太一條心，對座駕態度亦一樣，多年來一直支持法拉利同其母公司快意車廠，雖然今年復出F1會改揸平治嘅戰車出賽，但佢從未試過喺公開場合駕駛另一品牌嘅車輛，夠晒專一。

FXX No.1 Dream Car

舒麥加貴為一代車神，唔少人以為佢視戰車如衣服，殊不知完全相反，○六年舒麥加獲快意車廠慨贈一架Ferrari FXX靚車，即時愛不釋手，視為No.1 Dream Car！呢位名將亦鮮有無喇喇換車，多年來一直支持法拉利。

雖然舒麥加身家豐厚，但為人非常低調，唔會經常揸架法拉利四圍晒命，反而鍾意用普通車代步，費事咁張揚。舒麥加話：「我希望仔女好似普通人咁成長，唔好咁大壓力。」

「另外，我想話畀大家知，我手車雖然好辣，但平時係好守規矩嘅，絕對唔會超速㗎！」

C朗浮誇換車如換伴

C朗近年紅到發紫，不但身邊女伴如走馬燈，換車亦密過人，仲架架貴嘢架架浮誇，貫徹其財大氣粗真性情。而佢為追靚款，仲成日賤賣手上「過氣玩具」，蝕多多都唔肉痛，認真洗腳唔抹腳。

名車當散紙 蝕讓唔肉痛

喺葡萄牙窮足十幾年，C朗過檔曼聯突變暴發戶，有銀就身痕，効力紅魔鬼期間，先後購入平治、保時捷、法拉利、賓利等豪華靚車，當中全屬「殺女款」，搵架平實啲嘅都難。C朗去年夏天轉會皇家馬德里，因為喺西班牙須揸左軚車，喺英國嘅右軚心頭好未能跟身，但佢完全唔覺得可惜，冇用咪賣囉，當中好多都要蝕讓，其中一架Benz就僅賣得一萬鎊，但蝕幾百萬港元對佢嚟講，當係碎銀！

C朗去到馬德里後，唔夠兩個月，立即豪花四十萬歐元同二十萬歐元，分別買入林寶堅尼（LAMBORGHINI）同法拉利跑車，唔知第日埋單計數，C朗喺西班牙識嘅女仔多，定係買嘅靚車多呢？

碧咸重情「車王」多珍藏

比起C朗獨沽一味狂買「殺女車」，碧咸品味、級數明顯高一班。佢係當今球壇數一數二嘅「車王」，買車重量又重質，名下雖有型到震嘅超級跑車，但咸爺更愛歷史悠久，以及具優良傳統嘅名車。車房內廿八架「玩具」，全屬珍藏品，架架都內外兼備，兼有歷史意味，咸爺的確有Taste。

限量版改裝車兼備

九五年碧咸喺曼聯成名後，就以六千鎊買入生平首部座駕──紅色福特房車，自此就踏上瘋狂迷戀汽車嘅不歸路。錢愈搵愈多，碧咸買車亦愈買愈豪，最貴用上數十萬鎊，據非正式統計，佢多年所花嘅「車錢」高達三百萬鎊，都咪話唔乸脷。

碧咸特別鍾意限量版名車，而佢對改裝版亦極有興趣，顯示出與別不同嘅品味。初到美國，佢就買入一部改裝版嘅Cadillac Escalade旅行車，有型有款又實用，一啲都唔俗。老公玩車好過玩女人，所以老婆維多利亞都投其所好，三年前聖誕，就送咗部限量版嘅勞斯萊斯冧咸哥。