本文重點
唔知係咪叫得米拿嘅都係愈老愈可愛，以前溜馬嘅Reggie Miller打到三字頭之後仍然好勁，尋日就有波特蘭拓荒者嘅後衞安祖米拿，以34歲高齡射入52分，協助球隊作客打到加時，以114：112擊敗小牛。
安祖米拿99年開始被騎士選中開始打NBA，多年來比上不足、比下有餘，最出名嘅係佢擁有鐵人一樣嘅體能，曾經試過連續530場賽事上陣，創下喺NBA最長連續上陣紀錄。
單場獨取52分
呢個紀錄亦同時證明安祖米拿一直都好弗，能夠應付體力消耗極大嘅NBA賽事，所以即使去到34歲，仍然交出好表現。安祖米拿尋日帶領拓荒者作客小牛，31投22中，取得職業生涯新高嘅52分，加上貢獻5個籃板球同兩個助攻，協助球隊於加時後以114：112擊敗小牛。
上次有球員射入「50+」係上年11月由金塊嘅安東尼對紐約人造出，至於今季最高得分係公鹿班頓真寧斯嘅55分。但唔好唔記得呢兩個都係後生仔，更加證明安祖米拿呢個個人紀錄絕唔簡單。
本報綜合報道