本文重點
「大帝」勒邦占士果然人氣爆燈，日前美國媒體《商業周刊》選出體壇最具影響力運動員，結果占士僅次老虎活士排第二。事實上，「大帝」最近亦與快餐店巨頭麥當勞達成為期數年嘅合作協議，未來幾年肯定財源滾滾來。
《商業周刊》今次排行榜嘅準則，主要依照運動員嘅賺錢能力，雖然老虎活士去年底飽受桃色風波影響，但仍高踞首位。至於ＮＢＡ球員在頭二十位中，就佔咗五席，其中勒邦占士排第二、韋迪排第六、奧尼爾排第九、高比拜仁排十二，而鄧肯就排二十，正在養傷嘅姚明就排第六十八位。
最新夥伴麥當勞
勒邦占士極具商業價值，現時已經係多個機構嘅合作夥伴，包括Nike、可口可樂及保險公司State Farm等，日前「大帝」更與麥當勞達成廣告協議，佢除咗為麥當勞拍廣告，亦會出席麥當勞慈善之家及其餘公益事項。占士賺咁多錢，日前因踢水樽而被ＮＢＡ罰款兩萬五千美元，只係「散紙」而已。