韋迪連番犯錯累街坊！尋日熱火領袖韋迪喺主場擺下擂台，迎接由佢老友勒邦占士率軍嘅騎士，雖然韋迪上半場着晒火狂轟30分，可惜下半場失準僅入兩分之餘，尾段仲接連犯下多個嚴重錯誤，讓騎士有機可乘以92比91反敗為勝，難怪韋迪賽後都向球隊道歉，自責累街坊。

「閃電俠」韋迪尋日先甜後苦，開賽後手感極佳，同騎士領袖「大帝」勒邦占士一同上演飆分大戰，兩人單喺第二節已分別攻入20分（勒邦占士）及17分（韋迪），結果韋迪在上半場完結後攻入30分之多，個人生涯第四次在上半場攻入30+。可惜韋迪從更衣室出來後，飽受騎士緊迫防守下，表現變得暗淡無光，下半場只係為熱火貢獻兩分而已。

大帝兩罰全中助騎士反勝

最慘情係韋迪尾段連番犯錯，當球賽剩餘41秒時，熱火領先91比90，但韋迪竟然兩罰全炒未能為熱火拉開優勢，雖然騎士及後亦未能命中，控球權重返熱火手中，可惜韋迪在最後6.9秒時「玩嘢」後手傳球失誤，被占士搶截後「爆籃」遭受犯規，結果「大帝」兩罰全中反勝92比91，韋迪喺最後一擊又唔中，成為輸波罪人。

韋迪賽後表示：「我哋已經行到正確方向，可惜我今日犯咗好多平常唔會犯嘅錯誤，最終讓球隊付出輸波代價。」騎士贏埋今場後已獲得35勝11負，繼續排喺聯盟「一哥」位置。