英國電視台出陰招，諗住安排林柏特新歡舊愛同場出現，好彩「林伯」人緣好有隊友撐，最後齊齊宣布杯葛節目，先避過一場尷尬場面，呢次佢真係要請飲茶喇！
隊友杯葛節目拆掂
自和西班牙名模愛倫分手後，林柏特大把女埋身，最後佢情歸電視台主持Christine Bleakley，二人已行埋幾個月。早前當地電視台邀請車仔球星上節目，內容係搵WAG落廚煮嘢畀愛郎食，咁林伯嘅partner梗係Christine啦。
電視台為增加節目賣點，竟暗中安排愛倫到場。錄影前林伯得悉詭計，嚇到鼻哥窿都冇肉，想離場又怕一個走太肉酸。艾辛、艾殊利高爾同杜奧巴，見兄弟咁為難就齊齊話唔玩，林柏特先可以避過一劫咋！