ＴＤ花園地板出名光滑，一旦有水分嘅話，球員就會好易跣親。基於波士頓近日氣溫回暖，加上濕度極高，地板不時出水，球會職員已頻頻「趁機」抹地，以防跣親球員，但尋日塞爾特人對快艇，一開賽已不斷有球員滑倒。

場地濕滑 多人跣親

快艇教練米克鄧利維就表示：「我哋開賽時已經抱怨地濕嘅問題，因為呢種環境比賽風險極高，單係第一節我哋已經有四人跣親。」塞爾特人教練李華士亦認為球賽應該取消，因為對球員嚟講實在太危險。

不過，最終球賽如常完成，主隊憑皮雅斯攻入廿二分，加上加納特貢獻十七分，以九十五比八十九擊敗快艇，常規賽連贏兩場，結束早前頹勢。