本文重點
「得分里程碑」真係咁邪？今季NBA先後有魯域斯基獲得個人20,000分及高比拜仁射入個人25,000分嘅得分里程碑，但咁啱兩人喺該場賽事都係輸波而回。尋日呢個情況又多一個受害者，佢就係剛趕入今屆明星賽正選嘅鄧肯，呢位馬刺領袖喺尋日對火箭嘅賽事中射入25分，並踏入生涯20,000分里程碑，只可惜呢場波馬刺以109比116不敵火箭。
今場對鄧肯嚟講別具意義，皆因呢位老將只要在比賽中入1分，就已經拿下個人生涯第20,000分，結果佢首節剩餘10分16秒時已經做到，成為NBA史上第35位球員成為「二萬分先生」，同時亦係35人中第十個只効力一間球會而累積到此分數嘅球員。
NBA史上第35人
不過作客嘅火箭，似乎冇諗過畀面鄧肯呢位殿堂級人馬，佢哋憑布魯克斯及後備兵路維嘅優異演出，最終以116比109擊敗馬刺，成功終結近期作客5連敗嘅頹勢。獲得23分嘅布魯克斯表示：「我初時並唔知道鄧肯達到里程碑，但聽到球迷歡呼後先知，20,000分確係一個偉大數據，但勝利卻屬於我哋，我只能夠講聲抱歉。」至於鄧肯賽後就話：「我哋今場的確冇對手做得咁好。」雖然馬刺輸波，但現時仍緊守西岸第四位，而火箭就排第六。 本報綜合報道