本文重點
【本報綜合報道】尋日都算係「大帝」嘅日子，繼明星賽投票力壓高比仔成為「票王」後，勒邦占士在榜首大戰亦豪取37分，協助騎士以93比87擊敗由高比領軍嘅湖人，今季面對湖人全勝。不過，輸波嘅高比仔都獲得安慰獎，佢今場個人攻入31分，終成NBA史上最年輕達到25,000分嘅球員。
高比成最年輕二萬五千分得主
為報聖誕大戰一箭之仇，又要創下得分里程碑，高比仔開賽後打得特別落力，結果首節已取得12分，協助湖人有個好開始領先27比18。在第二節剩餘3分鐘左右，高比仔終於獲得個人生涯的第25,000分，較名宿張伯倫早35日獲此成績，成為史上最年輕達到25,000分嘅球員。
雖然完成個人里程碑，但最後勝利卻落入騎士手中，湖人在剩餘24秒時落後87比89，可惜中鋒加素在此關鍵時刻竟然兩罰全炒未能扳平，球隊及後只好作犯規戰術，但最終仍輸87比93，「紫金兵團」今季兩戰騎士都輸波。
勒邦占士今場繼續爆發，個人轟入37分成為贏波頭號功臣，佢賽後表示：「今場屬一場偉大勝利，但我哋要明白常規賽贏對方幾多次都冇用，最重要係總決賽擊敗佢哋。」
占士過去九次與高比仔交手，贏咗七次，真係抵佢牙擦！