「足球王」六位DJ來自社會各階層，佢哋本來嘅工作係電台後勤、娛樂節目DJ、大學生、貿易商人、女DJ，仲有個甲組球員後代，成班年輕人因為足球走埋一齊，佢哋因為出身唔同，睇波各有觀點，所以每次開咪都有火花。

Colun係「足球王」嘅開國元老兼主持人，負責聯絡咁多位老友埋位做節目，其實佢最初只係電台後勤人員，八年前一個足球節目因為有位嘉賓甩底，由佢臨時頂上，就咁入咗行。

各有特色必有火花

Martin係娛樂節目出身，又係一間廣告公司嘅家族成員，同班藝人最熟落，佢周不時搵古巨基、方力申、張繼聰等人估波，幫個節目搞氣氛。

女主持車車其實最想做演員，又讀緊西班牙文同日文，不過講波都難唔倒佢，因為車車由九八世界盃已經開始睇波，現年廿四歲嘅佢已有十二年「波齡」喇！

四十幾歲嘅青蛙，為搵食去過英國、菲律賓等地打工，依家係深圳一間貿易公司嘅老闆，正所謂食鹽多過你食米，「足球王」之中，青蛙嘅睇法最獨到。

廿七歲嘅阿占仲喺嶺大讀緊工商管理，今年內應該畢業，佢亦喺收費電視台做講波佬，佢亦係「足球王」嘅「資料庫」，球隊排陣同往績，佢都有齊。

嘉諾嘅父親係六十年代甲組足球員，雖然嘉諾長大後並冇加入球圈搵食，但讀完大學搵嘢做，去咗香港足球會任職，又成為「足球王」DJ，都算係靠足球搵食。