爵士對上一次「絕殺」馬刺，已經係九三至九四年球季，當時爵士五度擊敗馬刺，但之後都冇乜好日子過，馬刺曾經喺○○年至○五年，連贏爵士十八場，而且喺九九至○九年期間，喺主場AT&T球場曾保持十年不敗，估唔到爵士今季發憤圖強，威番一季。

鄧肯喺比賽末段六犯離場，令馬刺無力翻盤，大前鋒布沙係爵士贏波功臣，獨取三十一分，佢之前三次對馬刺均表現神勇，平均取得二十四分及十點七個籃板球。

金句王上身發謬論

「金句王」鄧肯賽後拋低一句至理名言：「輸波只係對手得分多過我哋，冇乜大不了。」咁有啟法性嘅評論，確實值得球迷慢慢咀嚼。

另外，NBA亦公布○九至一○年球衣銷量排行榜，一如所料高比拜仁、勒邦占士及杜域侯活分別排頭三名，較令人意外係公牛嘅戴歷羅斯由十一位升至第四，睇嚟呢位上季新人王的確累積咗唔少fans喎！不過公牛尋日作客卻以九十七比一○四不敵快艇。

本報綜合報道