（now 670周五早上9時直播）

兩隊目前分排聯盟第一、第二位，亦係東西岸「一哥」，湖人卅二勝九負，較騎士輸少兩場，即使今場輸波，仍可保住榜首位置，但今仗關乎兩大球王面子之爭，已經唔係贏輸咁簡單。

騎士湖人近況俱佳

兩大球王近十次交手，「大帝」勒邦占士率領嘅騎士贏咗七次，記得兩隊喺去年聖誕節交手時，騎士作客以一○二比八十七擊敗湖人，當時高比拜仁獨取卅五分，多過占士九分，但命中率僅得三成三，表現冇「大帝」咁生猛，該仗占士頻以策劃者身份出現，貢獻多球美妙助攻，高比仔如果想報仇成功，千祈唔好再咁獨食，要搵多啲隊友分擔進攻工作。

騎士近況相當好，近十場贏七場，所輸三場都係輸三分以下，「大帝」尋日鬥速龍表現甚佳，取得廿八分，十一次助攻及九個籃板球。至於湖人亦傷疲盡起，近兩場夫添出戰均順利擊敗對手，今場榜首大戰，肯定有排鍊。