本文重點
受傷都唔一定係壞事，好似「閃電俠」韋迪咁尋日面對火箭，忍受手腕傷患下轟入37分，協助熱火作客贏115比106，佢賽後就話全靠扭傷先有咁嘅表現咋！
亞連拿斯出庭認罪
熱火尋日作客休斯敦挑戰火箭，主隊教練阿杜文賽前已部署好搵兩大防守專家阿利沙及柏堤亞，輪流盯實韋迪，可惜兩人只能出醜收場，「閃電俠」韋迪全場遠射、剷籃及靚傳瓣瓣有，起手24次就入咗15球，投射命中率高達六成以上，全場就貢獻咗37分及８次助攻。
韋迪賽後竟然歸功於右手腕傷患：「我認為受傷反而幫咗我，因為我係一個突破型球員，正常情況下多數會剷籃得分，但受傷後迫使我轉變，射波時要將弧度投得更高，咁樣反而變得更準繩。」
至於巫師後衞亞連拿斯尋日就為持槍案上庭，佢承認違反首都特區無證持槍嘅指控，但因檢察官已同意，唔對亞連拿斯作超過法律規定下限嘅處罰，所以最高刑罰唔會超過入獄六個月。
