本文重點
邊個話冇主將就打唔出好波？金塊同巫師尋日各自缺少靈魂安東尼同亞連拿斯，牌面已經輸晒，但冇咗領袖反而激發起其他隊友嘅鬥志，最後分別勇挫騎士同魔術兩大東岸勁旅，而巫師另一隊長占美臣，賽前就對近日鬧得熱烘烘嘅賭錢及槍械事件，向球迷致歉。
亞連拿斯「慘被清洗」
涉嫌「佗槍」入球場嘅巫師主將亞連拿斯，因為對76人時擺出開槍「甫士」，被聯盟無限期停賽，而另外四名隊友巴特治、科爾、歷克楊格及麥基，就因為同亞連拿斯一齊開玩笑，各被罰款一萬美元，隊長占美臣昨日賽前特別公開向球迷致歉，認為近日種種事情非常丟臉。巫師為免畀亞連拿斯影響其他球員嘅情緒，尋日賽前將球場上所有關於亞連拿斯嘅海報移走，搬走晒佢喺更衣室入面嘅物品，兼洗咗佢嘅介紹片段，結果巫師憑占美臣獨取28分同11個籃板球，喺第4節奇迹反勝魔術104:97。
至於金塊對騎士，金塊靈魂「甜瓜」安東尼因傷缺陣，無緣同「大帝」勒邦占士正面交鋒。不過金塊仍憑比立斯轟入23分，加上簡安馬田喺完場前箝制「大帝」成功，助金塊贏騎士99比97。
■本報綜合報道