連續6仗獨取34+

賽前冇人諗過湖人今場會打得咁辛苦，皆因帝王有兩大主力伊雲斯及奇雲馬田同時缺陣，本身實力已經唔及湖人，如今更讓足車馬，主隊理應可輕易取勝。但勢估唔到客隊將士用命，加上高比仔初段手感一般，故打完半場帝王拋離湖人15分。

眼見球隊大落後，高比仔下半場隨即大爆發，第三節尾段個人連取13分，單節就攻入16分，助湖人逐步追貼分數。最後一節剩餘4秒時，湖人落後兩分但控球權在手，中鋒加素避開緊纏後傳交左邊嘅高比拜仁，後者無人看管下於0.1秒前出手，射入絕殺3分波，以109比108擊敗帝王。

今次除咗係高比仔今季連續六場攻入34分或以上，對上一次做出此成績，已經要數到02至03球季，當時高比仔連續九場貢獻「40+」！湖人教練積遜賽後就表示：「某些球員往往能做出令人難以置信嘅事情，例如投入匪夷所思嘅入球，今天看到高比拜仁，就彷彿見到當年米高佐敦嘅影子。」